احلى شعر عن العراق الجريح .........

كيفكم يا اصدقاء

انشاء الله تمام

جبتلكم شعر روعه

انشاء الله ينال اعجابكم

ونبداء الان

احلى شعر عن العراق الجريح .........
ــــــــــــــــــــــــــــــــــــــــــــــــــــــــ

القلم ومن القلم مليت
عمت عينه قلمنه الما نفع شِعره

تعب حته الشِعر ويه العراقيين
وصار بحال اهلنه وبالعراق ادره

رسمت حروف العراق برسم فنان
وجمعت اربيل والانبار والبصره

وگلت لازم حروفي توحد الخوّان
ما معقوله هيچ تصير فد مره


ورديت ولگيت دموع عالوجنات
حروف الي رسمتهه اليوم متطشره


كردستان تحچي بزودهه وتگول
احنه العاصمه وبغــداد متأخره


والانبار شالت سيف عالخوان
لو ليه الحكم لوفلّش الاسره


والبصره تگول احنه نريد اقليم
ومن نفط العراق الكُم فقط عُشره


وشفت للفتنه والله العراقيين
دون حروف جر يا ناس منجرّه


مذبوحه المحبه وناس تكره ناس
سويه الي يحب والقابض الجمره


حته الورد ما يرضه بعد بالماي
من دمنه تريد الورده والشجره


رقم جبنه قياسي بالقتل والموت
وصرنه اول شعب نص اهله متهجره


نهر دجله يـا ناس من الجثث غرگان
خلي نمد ادينه لدجـــــــــله وانجرّه


على جثثنه ادور هالفضـــــــــــائيات
ياهو الي يصــــور ياخذ الاجــــــره


معصوبه العـــــيون مچتفه الايدين
وانواع الرصاص يچوب بـــــصدره


لا اهله اجوي وچــــــــفّنوا بچـــفان
مجــــهوله الـــهويه ومن درة بأمره


اذا امّه الــــحنونه الصايمه برمضان
ما اكــــلت اكلهه وبقت تـــــــنتضره


تنــــــتضره يرد وتريد تحــجي وياه
اثاري العيـــــــــد لازم ينگطع مهره

لان باعت ذهبهه بشارع الصياغ
حته تزوج ابنهه الما فرح عمره

ما نامت بقت سهرانه كل اليل
ايا ليل العراق الما بزغ فجره

وما جاهه صبر طلعت تدور عليه
مثل طلعة حمامه بعينهه العبره

وما شافت ابنهه وجاهه ملك الموت
تعرف شنهي يعني تموت بالحسره ؟؟

معناها الفرح صاير مثل رجال
شايل ورده بيده وخنجر بضهره

معناها عراقك كاتل ومكتول
سوده گلوبهم وعقول مفتره

وكل هذا ويگلي احنه العراقيين
سنه وشيعه عشنه الحلوه والمره !!

لا والله چذب احنه العراقيين
سنه وشيعه مثل الضره عالضره

ملينه الچذب وليمته وليا دوب
واقع حال لازم نخضع لامره

ملينه الچذب وليمته وليا دوب
قصايدنه اجت للناس متأخره

نعم خوان احنـــــــــــــــــــــه
نعم خوّان احنه وياك آني بهاي
بس مو من بعد تفجير سامرّه

بعد تفجير سامرّه العراقيين
مثل فلم الرعب ودمايته الحمره

مو فتنه صحيح الصايره ابّغداد
سونامي الفتن بغداد منتشره

قتل مو عالهويه هواي متوهمين
صارت عالاسم گص راسه ويشمره

واليگلي تبالغ انته حيل بهاي
جبت حجه ودليل وياي هالمرّه

اتحده بكر واتحده ابو الخطاب
افن واحد البيهُم يوصل الثوره

واتحده على واتحده هم حسين
اذا فلوجه طبهه ومنكسر ضهره

صـــــــــفر كل النتايج للعراقيين
بس بالفتنه جابوا عشره من عشره

هذا يگول سني ناصبي اغتالوه
وهذا يگول شيعي رافضي نكفره

ضلّوا بهالسوالف يا خزي ويا عار
واسرائيل علگت نارهه الــــــكبره

يول وين الــــــــشرف گدامكم بغداد
شــــــگّوا ثوبهه واخذوهه متأسره

غتصبوهه الكُفر ... ما تسمعوهه تصيح
آنه ام الــــــــــــشرف واليوم مو عذره

بعد والله ما يــــــــــــــنفعنه قيل وقال
لات كـــلشي انتهه وانكــــسرت الجرّه


مرحوم الـــــــعراق استشهد من سنين
يا وسفه صفـــت أشلائه مـــــتنثره

متنـــثره بمزابل يمـــهه كوم چلاب
اكلت من لــــــحومه وما درت سرّه

صــــير وياي بس هالمره اترجاك
عيب من الــــــــــــعراق اليوم نتبرّه

صعبه بمزبله جثة الــــــــعراق تصير
خلي نشــــــــــيله منهه وندفنه بگبره

مشكور اخي
هذا الشعر يحكي حال العراقيين
تسلم للطرح

كلمات جميلة وهي تحكي عن العراق
ونوصف حالتهم رووووووووعة
كلمة قليلة جدا

شعر بيحكي حال العراق الجريح
ان شاء الله تتحسن الأوضاع عن قريب
يعطيك العافية

اهلن بيكم

منورين الموضوع

ويسعدني بان الموضوع اعجبكم

مع اطيب امنياتي

تحياتي

والله اكثر شعر أثر بي

لچمته لقلبي الابيات لانه بصراحة يحچي واقع العراق



بس والله عشنا طول عمرنا اهل وجيران واكلنا من سفرة وحدة

بس صحيح ورى تفجيرات سامرا صارت الفتنة ونجح كل عدو للعراق بامنيته وتشتتنا وتفرقنا

وتهجولنا وتهجرنا من صارت التفرقة



بس اكو امل چبير نرجع مثل ماچنا قبل الاحتلال اهل وحبايب

السني امه شيعية والشيعي امه سنية



لانه اكتشفنا الچذب اللي اجانه من ورا الحدود



مشكور اخي