الاكتئاب

موضوع: الاكتئاب الجمعة مارس 13, 2020 9:28 pm

منصة_الصحة_الطبية_السورية || #أطباء_ميددوز

<< بتتصلي برفيقتك بتقوليلا حاسة حالي مكتئبة كتير جيبيلك سطل نوتيلا بركي بيتعدل مزاجنا

‍�>>

لهيك لازم تعرفي إذا رفيقتك عنجد مكتئبة ولا هي حجة مشان النوتيلا

؟!

#الاكتئاب

مرض نفسي شائع يؤثر بشكل سلبي على شعور الشخص وتفكيره وتصرفاته ، ولحسن الحظ هو مرض قابل للعلاج .

ايمت بعرف انه أنا مكتئبة ولازمني طبيب ؟
إذا استمرت هي الأعراض يلي رح نحكي عنها على الأقل #أسبوعين .

شو هيي الأعراض ؟

الشعور بالحزن

.

انخفاض بالمزاج (مالك نفس على شي).

نقص بإحساس المتعة والسعادة بالأمور يلي كانت سابقا تفرحك وتبسطك (كنتي تفرحي لما تتسوقي هلأ ماعاد فرحك هالشي ).

تغيرات بالشهية (فقد أو كسب وزن) ^ دون نظام غذائي أو ريجيم^ .

مشاكل بالنوم (ماعم اقدر نام أو عم نام كتير).

عم بتعب زيادة(بحس طاقتي ناقصة) .

الشعور بالذنب (يعني بتشعري بالذنب إذا انثقب الأوزون انه ماتكوني انتي السبب

).

الشعور بانك شخص ماله قيمة ( بتحسي حالك صفر عالشمال مع انه انتي مو هيك) .

صعوبة بالتفكير والتركيز واتخاذ القرارات.

التفكير بالموت والانتحار (مو بس يارب موت

) لأ كمان مع أفعال ونية حقيقية بالانتحار

.

انتبهي عزيزتي انه في حالات طبية عضوية بتأدي لأعراض الاكتئاب متل نقص فيتامين معين أو مشاكل بالغدة الدرقية لهيك مهم الطبيب يشوفك .

بأي عمر بيحصل الاكتئاب ؟
بكل الأعمار وأكتر شي بآخر المراهقة لنص العشرينات .

مين أكتر النساء أو الرجال ؟
الدراسات بينت انه النساء احتمال إصابتن بالاكتئاب أكثر من الرجال

.

طيب أنا خفت هلأ كيف بدي اعرف إذا وضعي طبيعي ولا لازمني طبيب ؟
إذا كان عندك صدمة نفسية متل حالة وفاة بتقربك/ خسارة فرصة عمل مهمة /خيانة حبيب / ف الشي الطبيعي انه تصير معك بعض أعراض الاكتئاب لكن الفرق :

بحالة الصدمة المشاعر المؤلمة بتروح وبتجي يعني أحيانا بتتذكري شغلة حلوة بتفرحك او بصير معك موقف بيبسطك واحيانا بترجع تجيكي الحالة( على قولة امك اجتا الحالة)،
بينما بالاكتئاب حالتك بتزداد سوء وعلى وتيرة وحدة من مشاعر الحزن .

بالصدمة تقديرك لذاتك موجود غالبا ، أما بالاكتئاب ف غياب تقدير الذات أمر شائع .

ولاتنسي استمرار الأعراض ع #نفس الوتيرة عالأقل لمدة #أسبوعين ليتشخض اكتئاب ومن قبل #الطبيب .

️مين معرض أكتر انه يصير معه اكتئاب ؟

كلنا معرضين لانه هوي اضطراب عضوي بالدماغ يؤدي لنقص الناقل العصبي السيروتونين المسؤول عن المزاج (متله متل مرض السكري مثلا يلي سببه اضطراب عضوي بنقص الأنسولين)،
هاد السبب #الرئيسي للمرض وماتبقى هني عوامل مساعدة أو مطلقة للمرض .

الوراثة: وجدوا انه إذا عنا توأم واحد منن مصاب بالاكتئاب ف احتمال اصابة الآخر ٧٠ بالمية .

الشخصية: يعني الاشخاص يلي عندن قلة تقدير الذات ومابيحبوا حالن هدول سهل التأثير عليهن وممكن مشكلة بسيطة تطور عندن الحزن لاكتئاب .

عوامل بيئية : متل التعرض المستمر للعنف، للمشاعر السلبية ، للاحتقار، ممكن تطور عند الشخص اكتئاب .

انتبهي مو تروحي تقولي لأمك لانك بتعيطي عليي صار معي اكتئاب

..
أمك عامل مساعد هاد اذا انتي كيوت ومالا حق تعيط عليكي

.

التشخيص :

قصة سريرية وفحص سريري وبعض التحاليل أحيانا لنفي السبب العضوي بالجسم .

العلاج :

مضادات الاكتئاب أدوية بتأثر ع كيمياء الدماغ ، #ليست مهدئات و #ليست حشيش و #ليست منبهات حسب مايشاع ،
ممكن تأدي لتحسن خلال أول اسبوعين من العلاج لكن الفائدة كاملة مامنشوفا قبل #شهرين تلاتة .
مهم كتير تراجعي الطبيب ليشوف اذا في تحسن أو لا ، قد يخفف أو يزيد الجرعة أو يبدل الدوا .
وبينصح الأطباء انه تتاخد ٦ شهور أو اكتر بعد تحسن الأعراض .

العلاج النفسي يلي بيركز ع جلسات بين المريض والمعالج الكلام فيها هوي الأساس والتركيز عالمشاكل وحلها، قد تكون ذات فائدة بالاكتئاب الخفيف، أما المتوسط والشديد يتم معالجته بالمشاركة بين المعالج وبين الطبيب النفسي.

مساعدة النفس بتمارين رياضية وأنشطة مختلفة وتقديم المساعدة للآخرين وتناول أغذية حاوية على السيروتونين متل الشوكولا السوداء ، ومن عندي الابتعاد عن الأشخاص السلبيين

..هي أساليب #داعمة للعلاج وليست هي العلاج .

أهم شي ماتصدقي جارتك إذا قالتلك انتي معك اكتئاب #لأنك قليلة دين

..بحب قول لجارتك انه عم تزيد الطين بلة وتزيد شعورك بالذنب.

الدين منفصل عن الأمراض النفسية يلي هيي أمراض عضوية بالدماغ متلها متل غيرها من الأمراض .

خلي شعاركن بالحياة طنش تعش تنتعش لأنه مافي شي مستاهل I love you

منصة الصحة الطبية السورية

موضوع: رد: الاكتئاب الخميس مارس 19, 2020 8:08 pm

السلام عليكم

اسعد الله اوقاتك بالخير

موضوع قيم وجميل شكرا

سلمـت الايادي على هذا الطرح المتميز

بارك الله فيكـ وجزاكـ كل خير

لك مني كـل الشكــر

ننتظر جديدك

موضوع: رد: الاكتئاب الجمعة مارس 20, 2020 2:33 am

نوووورتي عسسسسسوولةةة

» دراسة: فيتامين (D) لا يقلل الاكتئاب
» كيف تنتصر على الاكتئاب؟
» علاج أعراض الاكتئاب
» معلومة طبية عن الاكتئاب
» حلول لمرضى الاكتئاب