فضفضة وحكي

موضوع: فضفضة وحكي الأربعاء مارس 15, 2017 3:19 pm

السلام عليكم ورحمة الله وبركاته

شلونكم يا جماعة الخير؟
ان شاء الله تكونوا بألف خير
الله يجعل ايامكم كلها فرح الكم وللغير

اليوم حبيت اطل عليكم وافضفض وياكم
واحكيلكم شكو ماكو عندي..

قبل اسبوع كنت منتظرة بشغف اسمع خبر حلو
كنت منتظرة شهور هالفرحة وعايشة بأمل كلش كبير انو ربي راح يكافيني وماراح يخيب ظني
صح كنت كلش خايفة ومتوترة وايدي على قلبي

دعيت من اعماق قلبي لنفسي ولكل شخص اعرفه وما اعرفه بالشي اللي منتظره يتحقق
ودعيت من كل قلبي انو يطلع اسمي وافرّح اهلي واللي يحبوني بخبر تعييني
الكل كان متحمس ومنتظر هالخبر على احرّ من الجمر
وكأنو همَّ اللي راح يتعينوا اول مرة هيك الكل كان وياية وقلبه على قلبي

كنت متابعة اخبار الوزارة بكل مكان واول بأول شمنزلين
الى ان اعلون انو اليوم ينزلون الاسماء..
هالحكي كان يوم الاربعاء وصادف 3/8

آني ما اعرف شصارلي قلبي فجأة بدأ ينبض بسرعة كبيرة وبقيت عايشة على اعصابي
الى ان صارت الساعة بحدود الخمسة العصر ونزلوا الاسماء
رحت بسرعة فتحت الرابط ونزلتهم وايدي ترجف وقلبي ما هدأ ابد
لحد ما شفت اسمي بالصفحة الاولى وسبحان الله حاطين اول محافظة صلاح الدين

ساعتها ما عرفت شسَوي بنفسي ضحكت من اعماق اعماق قلبي وگمت اشهگ من الفرحة اللي صارتلي
اريد احكي ما عدت اگدر بس ابتسامتي صارت بأكبر حجمها
وحلگي شكّل ع الضحكة وما عاد ينسد هههههههههههه

اهلي كانوا طالعين بس آني وخواتي الاثنين واخوية كان نايم
ما اعرف شلون وصلتلهم اسمي طلع ضمن اللي موافقين عليهم
بعدها رحت بسرعة اتصلت بـ بابا وبشرته وما اعرف شلون طلع الحكي مني
لان صوتي كان يرجف وهاا ابتسامتي بعدها على عرضها خخ
وبالاخير افتهم شنو السالفة

افتخرت بنفسي هواية وطرت من فرحتي بكل ما بيه
وفرحتي كبرت اكثر واكثر من الناس اللي احبهم وصديقاتي واقاربي
وهواية هواية ناس فرحوا لفرحتي وباركولي

بقى لساني يردد الحمد لله يا ربي .. الحمد لله
وكنت احسها تطلع من جواتي ومن نص قلبي
السعادة غمرتني بكل ما ببها وشعور ما اعرف افسره

من زمان ما فرحت هيك فرحة كبيرة واول مرة تكون بهالحجم
وهيك شي فعلا اجى بوقته المضبوط..
فعلا بعد كل حزن وكرب يمر بينا اكو فرحة منتظرتنا وهواية اشياء حلوة الله مخبيها النا
لانه ارحم بينا من كل هالبشر اللي حوالينا ومستحيل يضيع صبر واجر احد منا

شعور كلش حلو مريت بي وكلماتي ما راح يوصفوه مثل ما حسيته
بس حبيت تعيشون اللحظات اللي عشتها بهذاك اليوم..

ادري الحكي شلون مايكون ميصير مثل الواقع اللي تشوفه العين
بس ما اعرف ليش اجاني احساس اني اكتب كل اللي صار وياية واحكي الكم
هيك حبيت اشارككم اللي صار لاني ادري بيكم راح تفرحون لفرحي وهالشي راح يسعدني

طبعا اكو اشياء جنونية وحركات غريبة ومجنونة سويتها خخخ
بس ما تنحكي لاني ما اعرف شلون اوصلها الكم حتى تفهموها
بنفس الوقت اكو من راح يگول هاي اكيد خبلة خخ
بس يللا ولا يهمكم هي الفرحة من تطلع عن حدها الطبيعي تؤدي الى الخبال ههههههههههه

ما اريد اطول عليكم اكثر هذا كلشي عندي هالفترة
ما اريد منكم غير دعوة بظهر الغيب الي ولاهلي
وربي يتمملي على خير وابدي اداوم ان شاء الله

اشوفكم بخير وبمناسبات ثانية ان شاء الله
اترككم في امان الله وحفظه

مع السلامة . .